Кызылда 55-ки даг-адыгжы бригадазының скалодромунга маргылдаа

Дата: 21 мая 2020 г. 10:44 | Категория: Общество/Спорт | Формат новости: Видеосюжет

Кызылда 55-ки даг-адыгжы бригаданың дайынчылары болгаш Тыва
Республиканың альпинизм федерациязы Россияның Камгалал сайыды Сергей Шойгунуң төрүттүнген хүнү - 65 харлыын юбилейинге тураскааткан скалодромче үнер маргылдааларны эрттирген.
Мөөрей ийи аңгы чадага болган. Эгезинде 10 метр бедик, хая-дашка
дөмейлештир кылган скалодромче кым шалыпкын туттуннуп үнерин хынаан.
30-40 хар-назылыг спортчулар аразынга Айдаш Парашков шылгараан. Ол 18, 75 секунда иштинде скалодромнуң шыпшык бажынга четкеш, бадып келген. 19 база 25, 4 секунда үени көргүскен Михаил Чүлдүм-биле Буян Сактаагай тус-тузунда 2-3-кү черлерни ээлээн.
Делегей чергелиг маргылдааларның негелделеринге дүгжүп турар, тептинер, туттунар чадалары эвээш санныг “Эталлон” деп аттыг нарын адаан-мөөрейге база тиилекчилер илереп үнүп келген. 13, 5 секунда иштинде скалодромче маңнап үне бергеш, шыырак спортчу белеткелдиг чоруун бадыткааш, Аннаш Содунам чемпионнап каан. Кызылда 55-ки даг-адыгжы бригаданың чоргааралы, мындыг хевирлиг шеригжиткен маргылдааларның каш дакпыр чемпиону, Алик Дармаа 13, 7 секунда дургузунда скалодромнуң шыпшыын тепкеш, тиилекчиден чүгле 2 секунда эвээш болган. А 15 секунданы
көргүскен Чингис Норбу 3-кү черни ээлээн. 40-50 хар назылыг
спортчулардан скалодромче үнер күзелдиг кижи чүгле Роберт Содунам
болган. А эң улуг назылыг спортчу 73 харлыг Тыва Республиканың
альпинизм федерациязының президентизи Маадыр-оол Ховалыг база
скалодромче үнгеш, аныяк-өскенге үлегер-чижээн көргүскен.

(Сюжет от 21.05.2020 г.)